Rev 3 | PMA | STEP | Iesu viteni mun vit, “Kitis selusien koanik heha min angelo koa losil kat sios ten out Sardis kihit: “Koanik vi selkatien onen tai koa ro ral min Ninin oulu (7) koa mul en meten Ahi ka koa vuli kat hitu oulu (7). Nakilea en tounah vasi kami mimumoni. Avaseini meatin keil amundemi avit demkatien onami moul mules, ka inau nakilea keke demkatien onami mul mat.

Revelation of John 3

Selkatien Va Min Sios ten out Sardis

1 Iesu viteni mun vit, “Kitis selusien koanik heha min angelo koa losil kat sios ten out Sardis kihit:

“Koanik vi selkatien onen tai koa ro ral min Ninin oulu (7) koa mul en meten Ahi ka koa vuli kat hitu oulu (7). ^{▼▼3:1 Rev 1:20 mul viteni vit hitu oulu vi tatavolien ten angelo oulu.} Nakilea en tounah vasi kami mimumoni. Avaseini meatin keil amundemi avit demkatien onami moul mules, ka inau nakilea keke demkatien onami mul mat. 2 !Sakini, alli almea! Mihoumon demkatien koa mivuli kati veah mules hekeih tamun. Munak hermuktei nek, demkatien enek hematmat vasi. Veni navotini keke hati tounah koa mimumoni rotahostei veah en meten Ahi. 3 Sakini, mihendem kat hihiseien keil koa milonge ka mikur kati tuai. Mihehiles ran tisaen keil onami ka mihelong kati. Munak miheles mihematil en demkatien onami, nimai ris en avong koa miherkileatei hesuval tarhena tai ka niling hakot en kami.

4 “Ka kami teis en out Sardis milei kat revi moulien onami suval mimusin en eisin koa mutolas. Keil enges avinvin en meten Ahi keke avoual vatal minau en eisin taoh. 5 Koakeil emun avatimal keih en vaeen ten demkatien, keil isin en eisin taoh hemukonek. Inau nirsahul lintei ise ran Tus ten Moulien. En meten Tata onak ka angelo keil, inau nihit lati keke avi onak.

6 “!Munak ralingomi mul, mihetaengon asa koa Ninin mul viteni va min sios keil!”

Selkatien Va Min Sios ten out Piladelvia

7 Iesu vit risi minau vit, “Kitis selusien koanik heha min angelo koa losil kat sios ten out Piladelvia kihit:

“Koanik vi selkatien onen kei koa vi votut ka vi anatin, koa kur kat ki ten hiasuvien onen asuv houlu Deved telamu.'Navong kei seh voiteh, tovuol en etai kilea voteh eni; ka navong koteh eni, tovuol en etai kilea vaseha.'(Aesea 22:22) 8 Nakilea en tounah koa mimumoni. Avaseini keihoen havivi mul en kami, mimusil kat hihiseien keil onak ka mirmuun koetei keke mivi onak. Naseh voiteh tai keke mihekaka mihekistal ien, koa meatin sakras voteh eni. 9 !Mihetaengoni! Koakeil amul amusil kat sakien matu onen Siu keil ka avit avi Siu anatin, keil amules amusil kat rendemien onen Temat ka umai amul aluvos meatin keil houlu. Inau nisakin keil imai imot ihouhou min kami en alomi, ka ilea suk keke envatien onak mul en kami.

10 “Veni milong kat mengkatien keil onak lises ral min rendemien koa taveah en sakvisien keil, inau nikur koe kami en avong takeih koa hemai vasak vis meatin keil ten out netan. 11 Nimai hervitei tuetin, sakini mihehuli kat demkatien onami hekeih. Hemukonek, minamaentei meatin etai namai nahenan more uite ten demkatien ran kami. ^{▼▼3:11 Rev 2:10 vit uite ten demkatien vi moulien ten lisenges.} 12 Koakeil avatimal keih en demkatien one, nisakin keil imai ihi vatiseng en Eim Votut onen Ahi onak, ka ito eni lises. Nitis kat isen Ahi en keil, hetal min isen taon onen koa vi Serusalem Hau koa hemita netan ran out nesa. Inau nitis eis hau onak emun hel en keil.

13 “!Munak ralingomi mul, mihetaengon selusien koa Ninin mul viteni va min sios keil!”

Selkatien Va Min Sios ten out Laodesia

14 Iesu vit risi minau vit, “Kitis selusien koanik heha min angelo koa losil kat sios ten out Laodesia kihit:

“Koanik selkatien onen kei koa vi Anatin, tounah koa viteni anatin ka akilea avandesini. Kei vi vatte ten tounah keil vasi koa Ahi mumoni. 15 Nakilea en tounah koa kami mimumoni. Nalei kilea keke mirmandiltei ka mirmutintei. !Ekvati mok keke vahit mivasuval etai en keilu! 16 Ka veni kami mimules mimukonesek, mirmutintei ka mirmandiltei, inau nikus seha kami ran ongok. 17 Kami mivit, 'Tounah onomai houlu ka mero en amas, mertamureitei en etai tounah.' !Ka kami mireingeingeni mivinvin enges keke meatin sav envamahis kami ka valei vilehilu en kami! En meten Ahi mivi livere enges, mikaka hon, ka metomi var. 18 Sakini nasel kat kami keke mihehuli ranau gol, eisin taoh ka meresin ten amet. Gol koa mihehuli ranau hetolas, hesakin kami mihilelau en tounah keil ten out nesa. En eisin taoh ten maluen, mihesin koe avemi keke minamemoutei mun ven kakahonien onami. Ka en meresin ten amet, mihesahula en metomi ten demkatien onami hesakini mihelele revi.

19 Koakeil envatien onak mul en keil, naralimal en keil ka namulelas keil. Sakini, rendemien onami hekeih keke mihehiles ran tisaen keil onami. 20 !Mihetaengoni! Inau narosin tetai en kami suval namulomal en voiteh ka namul navise kami. Munak mihelong rek ka mihemai mihesehen voiteh ten moulien onami minau, inau nimai neim ka nianian hetal min kami, ka kami mun miheanian hetal minau. 21 En vaeen ten demkatien, koakeil avatimal keih, inau nimaen keil itondan en usite ten vuluk ten keihoen, hesuval etin koa inau mun navatimal keih en vaeen ten demkatien, ka kosa, namul narondan en usite matu ten vulin ten keihoen onen Tata onak.

22 “!Munak ralingomi mul, mihetaengon selusien koa Ninin mul viteni va min sios keil!”